चन्द्रप्रकाश नेपाली
घोराही । भारत हुँदै नेपाल आएको सलहको अर्को झुण्डले धेरै नोक्सानी नगर्ने विज्ञले बताएका छन । प्यूठान, अर्घाआँची लगायतका जिल्लामा केही नोक्सानी गर्न सक्ने भए पनि अहिले पानी परिरहेकाले धेरै क्षति भने नहुने प्लान्ट क्वरेण्टीन तथा विषादी व्यवस्थापन केन्द्रका प्रमुख सहदेव हुमागाईंले बताउनुभयो ।
तर सावधानी भने अपनाउन उहाँले आग्रह गर्नुभएको छ । झण्डै १० देखि १२ लाखको संख्यामा आएका सलहको झुण्ड हिजो बेलुका प्यूठानमा रहेका र केही ठाउँमा नोक्सानी गरेको खबर आएको उहाँले बताउनुभयो ।
अहिले हावाको गति पूवोत्तर दिशामा रहेकाले भारतबाट सलहको झुण्ड नेपाल प्रवेश गरेको हुमागाईंले बताउनुभयो । अझै केही सख्यामा नेपाल आउने सम्भावना कायमै रहेको उहाँको भनाई छ ।
भारतको उत्तर प्रदेशको सीतापुर तथा बहराइच क्षेत्रमा रहेका सलहमध्ये एउटा बगाल दाङको गढवा गाउँपालिकाबाट अस्ति नेपाल आएको हो ।
