कवि हितप्रसाद उपाध्यायका बारेमा

पूर्वसभासदः सम्झना बि.क.

कवि हितप्रसाद उपाध्यायका झन्डै समवयी ८६ वर्षीय गुणराज सुवेदीले हितप्रसाद उपाध्यायद्वारा लिखित तर हाल अप्राप्य ‘थीर बम’ महाकाव्यका कण्ठस्थ केही श्लोक सुनाएर नेपाली साहित्यमा ठूलो गुन (गुण) लगाउनुभयो ।

नेपाली काङ्ग्रेस र नेपाल कम्युनिस्ट पार्टीको समेत सहभागितामा २००७ सालमा भएको राणाशासनविरोधी विद्रोहमा वीरगन्ज मोर्चा समाल्ने मुक्ति सेनाका कमान्डर थीर बम मल्ललाई नायक (अभिमन्यु) का रूपमा चित्रण गरेर लेखिएको उक्त महाकाव्यमा काङ्ग्रेस नेताहरू गणेशमान, बीपी, सुवर्णहरूलाई महाभारत युद्धका भीष्म, पितामह, द्रोणाचार्य, अस्वत्थामा, युधिष्ठिरलगायत सत्पात्र र राणाशासकहरूलाई शकुनी, दुर्याेधन, कंश, दुःशासनलगायत खलपात्रका रूपमा चित्रण गरिएको उक्त महाकाव्यको गहन अध्ययन गरेका नवराज सुवेदी, गुणराज सुवेदीलगायत अध्येताहरू बताउँछन् ।

स्मरणीय छ, कवि हितप्रसाद उपाध्याय राणशासनविरुद्धको विद्रोहमा पहिला मुक्ति सेना र पछि रक्षा दलका योद्धा हुनुहुन्थ्यो ।उक्त महाकाव्यको पाण्डुलिपिको खोजी जारी छ र भेट्ने व्यक्तिलाई २५ हजार इनामसमेत घोषणा गरिएको छ ।