जनादेश, काठमाडौं ।
काठमाडौंमा वायु प्रदूषणको स्तर भयावह तहमा पुगेको छ । प्रदुषण घातक सत्रमा पुगेपछि केही दिन मर्निङ वाकमा ननिस्किन स्वास्थ्य मन्त्रालयले अपील नै गरेको छ ।
मन्त्रालयले केही दिन यता मौसममा आएको परिवर्तनसँगै काठमाडौँ उपत्यकाको वायु प्रदूषण निकै बढेको हुँदा सावधानी अपनाउन अपिल गरेको हो ।
वायु प्रदूषण अत्याधिक बढेको हुँदा मानव स्वास्थ्यमा असर पर्नसक्ने अवस्थालाई मध्यनजर गर्दै सचेत रहन सबैमा मन्त्रालयले अपिल गरेको हो ।
मन्त्रालयले मंगलबार प्रेस विज्ञप्ति जारी गर्दै हालको वायु प्रदूषणको अवस्थालाई मध्यनजर गरेर आकस्मिक रुपमा निम्नअनुसारका काम गर्न सरोकारवालाहरु सबैमा अनुरोध गरेको छ ।
काठमाडौं उपत्यकामा वायु प्रदूषण अत्यधिक बढेसँगै वातावरण विभागले अत्यावश्यक कामबाहेक साँझ र बिहान बाहिर ननिस्कन आग्रह गरेको छ ।
घरबाहिर निस्कनै परेमा विशेष सावधानी अपनाउनसमेत विभागले आग्रह गरेको छ ।
विभागले फोहोरजन्य प्लास्टिकहरूका कारण थप प्रदूषण बढ्ने भएकाले नबाल्न पनि अनुरोध गरेको छ । यस्तै अवस्था भएपछि गत वर्ष भारतको राजधानी नयाँ दिल्लीवासीलाई त्यहाँको सरकारले ५० लाख मास्क वितरण गरेको थियो । वायु प्रदूषणले गम्भीर स्वास्थ्य संकट सिर्जना गर्न थालेपछि दिल्ली सरकारले जनस्वास्थ्य संकटकाल समेत घोषणा गरेको थियो ।
रियल टाइम एयर क्वालिटी इन्डेक्स (एक्यूआई)का अनुसार काठमाडौं उपत्यकाको वायु प्रदूषण जोखिमको तहमा पुगेको छ । एक्यूआईका अनुसार अहिले काठमाडौं उपत्यकाका विभिन्न स्थानमा वायु प्रदूषण सूचकाङ्क न्यूनतम ३ सय ५९ छ भने अधिकतम ४ सय ८ छ । एक्यूआईमा ३ सय १ भन्दा माथिको संख्या देखिनु भनेको उच्च जोखिमको संकेत हो ।
