एजुकेशनपत्र, मकवानपुर । हेटौंडा उपमहानगरपालिकाले कानुन बमोजिम तोकेको दरको छात्रवृत्ति वितरण गर्न र विवरण पेश गर्न संस्थागत विद्यालयलाई निर्देशन दिएको छ ।
काठमाडौं महानगरपालिकाका मेयर बालेन शाहको सिको गर्दै हेटौंडा उपमहानगरपालिकाले पालिका भित्र सञ्चालनमा रहेका सबै संस्थागत विद्यालयले कानुनले तोके बमोजिमको छात्रवृत्ति उपलब्ध गराउन र सोको विवरण असार २० गतेसम्ममा उपलब्ध गराउन निर्देशन दिएको हो ।
केही दिनअघि काठमाडौँका मेयर बालेनले महानगरपादिका भित्र संचालनमा रहेका संस्थागत विद्यालयले कानुनले तोके अनुसार छात्रवृत्ति उपलब्ध गराउन निर्देशन दिएका थिए । उनको निर्देशन पश्चात काठमाडौंमा सो निर्णय कार्यानवयन भएको थियो । सोही अनुसार उपमहानगरपालिका भित्र सञ्चालनमा रहेका संस्थागत विद्यालयहरुमा कानून अनुसारको छात्रवृत्ति वितरणको काममा कडाइ गरेको हो ।
उपमहानगरपालिकाले एक सूचना जारी गर्दै असार २० गते सम्म छात्रवृत्ति दिएका विद्यार्थीहरुको पूर्ण विवरण र अभिभावकको सम्पकै नम्बर सहित उपमहानगरपालिकामा बुझाउन निर्देशन गरेको छ ।
हेटौंडाका निजी विद्यालयहरुले छात्रवृत्तिमा विद्यार्थी नपढाउने गरेको गुनासो गरेपछि हेटौंडा उपमहानगरपालिकाले छात्रवृत्ति उपलब्ध गराइएको विद्यार्थीको विवरण बुझाउन निर्देशन गरेको शिक्षा विकास महासाखाका प्रमुख गंगाधर रिमालले जानकारी दिए । निःशुल्क तथा अनिवार्य शिक्षा ऐन २०७५ अनुसार संस्थागत विद्यालयहरुले अध्ययनरत विद्यार्थीलाई छात्रवृत्ति उपलब्ध गराएको तथ्याङ्क पेश गर्न भनिएको हो ।
ऐनअनुसार ५०० जना सम्म विद्यार्थी भएका संस्थागत विद्यालयहरुले १० प्रतिशत पूर्ण छात्रवृत्तिमा पढाउनुपर्ने व्यवस्था रहेको छ भने ५०० भन्दा माथि ८०० जना विद्यार्थी अध्ययनरत विद्यालयले १२ प्रतिशत र ८०० जना भन्दा माथि विद्यार्थी अध्यनरत भएका विद्यालयले १५ प्रतिशतका दरले विद्यार्थीलाई पूर्ण रुपमा छात्रवृत्ति उपलब्ध गराउनु पर्ने व्यवस्था रहेको छ ।
