जनादेश, काठमाडौं ।
विश्व स्वास्थ्य संगठन (डब्ल्यूएचओ) ले कोरोनाविरुद्धको खोप सन् २०२१ भन्दा अघि आउँने सम्भावना कम रहेको बताएको छ ।
डब्ल्यूएचओका इमेर्जेन्सिज प्रोग्रामका प्रमुख माइक रयानले कोरोनाको खोप निर्माणमा प्रगति भइरहे पनि २०२१ भन्दा अघि खोपको निर्माण हुने अपेक्षा गर्न नसकिने बताएका छन् । महामारीको यस घडिमा कोरोना भाइरस नियन्त्रणको लागि कडा कदम चाल्नु नै महत्वपूर्ण रहेको रयानले जनाएका छन् ।
यस्तै, डब्ल्यूएचओले खोप निर्माणपछि सबै मुलुकमा न्यायोचित वितरण होस् भन्ने सुनिश्चित गर्नको लागि काम गरिरहेको समेत उनले जानकारी दिए । विभिन्न मुलुकमा निर्माण भएको खोप परीक्षण भइरहे पनि अहिलेसम्म कुनै खोप पनि सुरक्षा र प्रतिरोधी क्षमता विकासको मामिलामा सफल नदेखिएको रयानले जनाए ।
