जनादेश काठमाण्डौ ।
साउन सत्तारुढ नेकपामा स्थायी कमिटी बैठक आगामी १४ गतेसम्मका लागि स्थगित भएसंगै अध्यक्षद्वय केपी शर्मा ओली र पुष्पकमल दाहालबीच पुनः संवादहीनताको अवस्था आएको छ ।
विवादित अधिकांश विषयमा छलफल गर्ने महत्वपुर्ण निकाय स्थायी कमिटीलाई बन्धक बनाएका दुई अध्यक्षबीच विभिन्न एजेण्डामा छलफल भएपनि सहमति हुन सकेको छैन ।
स्थायी कमिटी बैठक गत असार १० गते यता झण्डै दर्जन पटक स्थगित भईसकेको छ । मुलुकभरको बाढी पहिरोबाट परेको प्रभावमा सरकार र पार्टी केन्द्रीत हुन परेकाले अन्य विषय अहिले ओझेलमा परेको स्थायी कमिटी सदस्य सुवासचन्द्र नेम्वाङले बताउनुभयो ।
यद्यपी सहमतिका लागि आन्तरिक छलफल जारी रहेको उहाँको भनाई छ । कोरोनाले पारेको प्रभाव, भारतसंगको सीमा विवाद, एमसीसी लगायतका विषयमा छलफलका लागि बोलाईएको बैठक प्रधानमन्त्रीको राजिनामामा केन्द्रीत भएपछि पार्टी भित्रको विवाद अहिले उत्कर्षमा छ ।
