जनादेश काठमाण्डौ,
घोराही । विदेशमा अलपत्र नेपालीलाई स्वदेश फर्काउने उद्देश्यले सरकारले जेठ २९ देखि खुला गरेको उद्धार उडान तत्काललाई रोकेको छ ।
संस्कृति, पर्यटन तथा नागरिक उड्ययन मन्त्रालयका सहसचिव बुद्धिसागर लामिछानेले पछिल्लो पटक देशभर बाढिपहिरो लगायत दैवी विपत्तिका कारण उद्धार उडानबाट काठमाडौं ओर्लिने सर्वसाधरणलाई प्रदेश र स्थानीय तहमा बनाइएका होल्डिङ सेन्टरमा लैजान समस्या देखिएपछि तत्काल उद्धार उडान रोकिएको हो ।
सीसीएमसीले जेठ २९ देखि थालेको उद्धार उडान पछिल्लोपटक साउन ८ सम्म खुला गरिएको थियो । अलपत्र नेपालीलाई उनीहरुकै खर्चमा उद्धार गर्ने भनिएको थियो । यो अवधिमा २५ वटा मुलुकबाट ३४ हजार ८ सय ३० नेपाली स्वदेश फर्किएका थिए ।
उद्धार उडानका लागि सीसीएमसीले स्वदेशी तथा विदेशी वायुसेवा कम्पनीलाई अनुमति दिँदै आएको थियो ।सरकारले नियमित उडान भदौ १ गतेदेखि सुचारु गर्ने जनाएको छ ।
यसैबीच वायुसेवा सञ्चालक संघ नेपालले आज पर्यटन मन्त्री योगेश भट्टराईलाई प्राकृतिक विपतका बेला नियमित उडान खुला गर्न ज्ञापन बुझाएको छ ।
सरकारले भदौ १ गतेदेखि भीडभाड हुन नदिन प्रतिघन्टा ३ सय यात्रुलाई सेवा दिने उद्देश्यले लकडाउन अघिको दाँजोमा भदौमा पहिलो चरण २५ प्रतिशत मात्रै उडान खुला गर्ने तयारी गरेको छ ।
